- हुम्ला हिमपहिरोबारे अध्ययन गर्न गएको टोलीले तीन वटा हिमताल फेला पारेको जनाएको छ।
- अध्ययन टोलीले ५ हजार ३ सय ५० मिटर उचाइमा तीन वटा हिमताल भेटिएको पुष्टि गरेको छ।
- १ जेठमा आएको हिमपहिरोका कारण तिलगाउँका १८ घरका ३२ जना विस्थापित भएका थिए ।
१२ जेठ, हुम्ला । हुम्लाको नाम्खा गाउँपालिका-६ तिलगाउँमा आएको हिमपहिरोको कारण पत्ता लगाउन हुम्ला पुगेको सरकारी अध्ययन टोलीले तीन वटा हिमताल फेला परेको जनाएको छ।
तिलगाउँमा हिमपहिरो आउनुका कारणबारे अध्ययन गर्न पुगेको विज्ञ टोलीले ५ हजार ३ सय ५० मिटर उचाइमा तीन वटा हिमताल फेला परेको जनाएको छ ।
खानी तथा भूगर्भ विभागका सिनियर डिभिजनल जिओलोजिस्ट शिवकुमार बास्कोटाका अनुसार यसअघि दुई वटा हिमताल देखिएको स्थानमा तीन वटा हिमताल भेटिएको उनले पुष्टि गरे ।
अध्ययन टोलीमा बास्कोटा सहित राष्ट्रिय विपद् जोखिम न्यूनीकरण तथा व्यवस्थापन प्राधिकरणका सिनियर डिभिजनल इन्जिनियर सुशीलकुमार श्रेष्ठ र जल तथा मौसम विज्ञान विभागका हाइड्रोलोजिस्ट सौहाद्र जोशी छन् ।
१ जेठ राति आएको हिमपहिरोले नाम्खा गाउँपालिका-६ तिलगाउँका १८ घरका ३२ जना विस्थापित भएका थिए । हिमपहिरोबाट लघु जलविद्युत् तथा खानेपानी आयोजना, सिँचाइ, काठेपुल, ४ सय रोपनी खेतीयोग्य जमिनमा क्षति पुगेको थियो ।