१२ जेठ, काठमाडौं । रोवर्ट लेवान्डोस्कीले दुई गोल गरेपछि बार्सिलोनाले स्पानिस ला लिगाको अन्तिम खेलमा एथ्लेटिक विल्वाओलाई ३-० ले पराजित गर्दै सिजन सकाएको छ ।
यसअघि नै ला लिगा उपाधि जितिसकेको बार्सिलोनाले अन्तिम खेल जितसहित सुखद अन्त्य गरेको हो ।
विल्वाओको मैदानमा भएको खेलमा लेवान्डोस्कीले १४औं मिनेटमा पहिलो गोल गरेका थिए । हान्सी फ्लिकको टिमले यस सिजन गरेको यो एक सयौँ गोल समेत हो । लेवान्डोस्कीले १७औं मिनेटमा दोस्रो गोल गरे । यससँगै लेवान्डोस्कीले यस सिजन ला लिगामा २७ र सग्रमा ४० गोल गरे । ला लिगाको सर्वाधिक गोलकर्ता भने रियल मड्रिडका केलिएन एमबाप्पे बने । रिउलमा पहिलो सिजनमै उनले ३१ गोल गरे ।
यस्तै डानी ओल्मोले इन्जुरी टाइममा पेनाल्टीबाट गोल गरे ।
२८औं पटक ला लिगाको उपाधि जितेको बार्सिलोनाले यस सिजन ३८ खेलबाट ८८ अंक जोड्यो । जसमा २८ जित र ४ बराबरीको नतिजा निकालेको थियो भने ६ खेलमा पराजित भएको थियो । बार्सिलोनाले दोस्रो स्थानको रियलमाथि ४ अंकको अग्रतासहित लिग सकाएको हो ।
यसअघि नै अर्को सिजनका लागि च्याम्पियन्स लिगमा स्थान पक्का गरेको विल्वाओ ३८ खेलबाट ७० अंक जोडेर चौथो स्थानमा रह्यो ।